"Vaşinqton sammitinin keçirilməsinə əsas səbəb Rusiyanın işğalçı siyasətinin qarşısını almaqdır".

Bu sözləri Axar.az-a açıqlamasında NATO Əməkdaşlıq İnstitutunun rəhbəri Fərrux Məmmədov deyib.

O, Putinin hazırda çox narahat olduğunu bildirib:

"Bu gün artıq Ukraynada savaşan separatçılar deyil. Orada Rusiya Müdafiə Nazirliyinə tabe əsgərlər savaşır. Onlara hər cür dəstəyi isə Rusiya Baş Kəşfiyyat İdarəsi (QRU) verir. Səbəb Krıma gedən yolu işğal etmək və bununla Ukraynanın şərqinə tam hakim olmaqdır. Əgər Putinin bu planı gerçəkləşərsə, o zaman Avropa gələcək təhlükəsizliyini yenidən gözdən keçirməli olacaq. Keçiriləcək sammiti bir növ fövqəladə toplantı da adlandırmaq olar. Rusiya artıq Avropanın strateji və önəmli parçası olan Ukraynada açıq şəkildə müharibə aparır və digər tərəfdən, Avropaya mesaj verir ki, istənilən an mən sizin üçün təhlükəyəm. Amerika bunu bilir və müttəfiqi olan Avropanı bu məsələdə daha konkret olması üçün Vaşinqtona dəvət edir.

Sammitdə önəmli məsələlərdən biri də Cənubi Qafqaz ölkələri ilə bağlı olacaq. Həmçinin, 2016-ci il Varşava Sammitində Gürcüstanın NATO-ya üzvlüyü məsələsi qaldırılacaq. Amerika bu məsələdə tələsir, çünki Ukrayna hadisələri bunu vacib edir. Əgər Gürcüstan NATO ölkəsi olarsa, onda Rusiyanın Cənubi Qafqazdakı tam hakimliyinə son qoyulacaq və yeni siyasi era başlayacaq. Təbii ki, sammitdə bağlı qapılar arxasında bir sıra önəmli məsələlər də müzakirə olunacaq. İctimaiyyətə bəlli olmayan bir neçə qərar qəbul oluna bilər. Bu baxımdan sammit Putini çox narahat edir. Onun yeganə şansı Rusiya kəşfiyyatının bu sammit haqda ona verəcəyi məlumatlardır".

Qeyd edək ki, fevral ayında Rusiyanın Avropadakı fəaliyyətinin əleyhinə Vaşinqton sammiti keçiriləcək.