"Axar.az" xəbər verir ki, dünya mətbuatında Nelson Mandelanın İsrailin Xüsusi Kəşfiyyat xidməti Mossadın yetirməsi olduğu iddia olunub.

"Harets" qəzetində yayımlanmış məktubda göstərilir ki, 1962-ci ildə Mandela Afrika Beynəlxalq Konqresindən hərbi yardım tələb etmək məqsədilə Efiopiya, Əlcəzair, Misir və Qana kimi Afrika ölkələrinə səfərlər edib. Efiopiyadaki Mossad rəhbərliyi, İsrail Xarici İşlər Nazirliyinə yazdığı məktubda bildirir ki, Mandela Efiopiyadakı Mossad agentlərindən cüdo, təxribat, silah təlimləri alıb, lakin təlimçilər onun kimliyindən xəbərsiz olublar.

1962-ci il oktyabrın 11-də yazılmış məktubda deyilir:

"Xatırladığınız kimi, iki ay əvvəl Efiopiyadakı İsrail səfirliyinə gəlib, efiopiyalılardan (yəni, Mossad agentlərindən) təlim görən David Mobsari adlı biri haqqında sizə məlumat vermişdik. Adamlarımızı "şalom" deyə salamlayır, yəhudilərin problemlərindən xəbərdar, sosialist fikirli, kommunizmə meylli biri idi. Biz onu "sionist" etməyə çalışdıq. Mediada yayımlanan şəkillərə baxılsa, Cənubi Afrikada həbs olunmuş adamla Devid Mobsari eyni adamlardır".