Tehran Vaşinqtonun İrandakı maraqlarının müdafiəçisi kimi İsveçrənin Tehrandakı müvəqqəti işlər vəkilini Xarici İşlər Nazirliyinə çağırıb.

Axar.az APA-ya istinadən xəbər verir ki, bu barədə “Tasnim” məlumat yayıb.

Bildirilib ki, Donald Trampın nüvə razılaşması əldə olunmadığı təqdirdə İranı bombalayacağı xəbərdarlığından sonra İran İsveçrə nümayəndəsini XİN-ə çağırıb və diplomata etiraz notası təqdim olunub.

Görüşdə İran XİN-in Amerika üzrə Baş İdarəsinin rəisi İsa Kamili İsveçrə səfirliyinin müvəqqəti işlər vəkilinə etirazını bildirərək, İranın belə təhdidlərə qəti şəkildə cavab verəcəyini bəyan edib.

İsveçrəli diplomat İranın etirazını tezliklə ABŞ tərəfinə çatdıracağını bildirib.

Qeyd edək ki, ötən gün Donald Tramp Tehranın nüvə proqramı ilə bağlı razılığa gəlmədiyi təqdirdə İranın misli görünməmiş bomba hücumuna məruz qalacağı ilə bağlı xəbərdarlıq etmişdi.

İranın ali rəhbəri Əli Xamenei isə bəyan edib ki, ABŞ prezidenti İrana hücum edərsə, güclü zərbə ilə üzləşəcək.