ABŞ Prezidenti Donald Trump Rusiya, Belarus, Kuba və Şimali Koreyadan (KXDR) idxal olunan mallara əlavə ticarət rüsumları tətbiq etməyib. Çünki bu ölkələr artıq ABŞ sanksiyaları altındadır.

Axar.az xəbər verir ki, bunu Ağ Evin mətbuat katibi Karolina Levitt “Axios” portalına açıqlamasında bildirib.

Onun sözlərinə görə, bu dörd ölkəyə qarşı tətbiq edilən mövcud sanksiyalar kifayət qədər sərtdir və əlavə ticarət məhdudiyyətlərinin tətbiqi hazırda nəzərdə tutulmur. Bununla yanaşı, o vurğulayıb ki, gələcəkdə Rusiyaya qarşı “əlavə sərt sanksiyalar” tətbiq oluna bilər.

Yeni tariflər Kanada və Meksikaya da şamil edilməyib. Ağ Evin sözçüsü bunu ABŞ-ın daha əvvəl bu ölkələrə qarşı 25%-lik xüsusi tariflər tətbiq etməsi ilə əlaqələndirib.

Qeyd edək ki, 2 aprel tarixində Donald Trump ABŞ-ın idxal olunan mallar üçün gömrük rüsumları tətbiq edib.