Ötən gecə Günəşdə ən yüksək səviyyəli – maksimum sinifli partlayış baş verib.

Axar.az Teleqraf-a istinadla xəbər verir ki, bu barədə Rusiya Kosmik Tədqiqatlar İnstitutu məlumat yayıb.

Bildirilib ki, partlayış zamanı Yerə çata biləcək plazma və ya hissəcik axını müşahidə edilməyib, bu səbəbdən planet üçün hər hansı təhlükə yaranmayıb.

Alimlər bildiriblər ki, maqnit sahəsi sabit olsa da 29 may tarixində maqnit aktivliyində artım gözlənilir:

"Bu tarixdə maqnit indeksi 5 baladək yüksələ bilər, bu isə orta güclü maqnit qasırğasının başlanması deməkdir. 30 mayda qasırğa davam edə bilər, 31 mayda isə vəziyyət stabilləşəcək. Bu səbəbdən mayın son günlərində sağlamlığa xüsusi diqqət yetirilməsi tövsiyə olunur".

Qeyd edək ki, daha əvvəl aparılmış müşahidələrə əsasən, Günəşdə yeni partlayışların baş verməsi ehtimalı da istisna edilmir.