Azərbaycanlı FİFA referisi Əliyar Ağayev Rusiya və Nigeriya milliləri arasındakı yoldaşlıq görüşünü idarə edib.

Axar.az Teleqraf-a istinadən xəbər verir ki, Moskvadakı "Lujniki" stadionunda baş tutmuş matç 1:1 hesablı heç-heçə ilə yekunlaşıb.

Rusiya millisi 27-ci dəqiqədə Semi Acayinin avtoqolu ilə önə keçsə də, 71-ci dəqiqədə Toluvalase Arokodare tarazlığı təmin edib. Nigeriya yığmasının bərabərlik qolunu Fransa PSJ-sinin heyətində UEFA Çempionlar Liqasını qazanmış rusiyalı qapıçı Matvey Safonovun kobud səhvindən sonra vurub.

Beləliklə, qonşu ölkə yığması 2023-cü ildən sonra ilk dəfə qapısından top buraxıb. "Quru seriya" 845 dəqiqə davam edib.

Ağayev meydan sahiblərinin 3, qonaqların 1 futbolçusuna sarı vərəqə göstərib.

Qeyd edək ki, Əliyar Ağayevə yan xətt hakimləri qismində Zeynal Zeynalov və Akif Əmirəli yardımçı olub.