Hind kinosunun memarlarından sayılan Rac Kapur 1956-cı ildə Hind Filmləri Festivalında iştirak etmək üçün Bakıya gəldiyi zaman bir çox maraqlı hadisələr yaşanıb.

Axar.az Moderator.az-a istinadən böyük aktyor Rac Kapurun Bakıya gəlişi ilə bağlı 2 maraqlı xatirəni təqdim edir:

Birinci xatirə

Rac 1956-cı ildə Bakıya gələndə dostu Rəşid Behbudovun evində qalmaq istəyir. Buna görə Azərbaycan MK-nın rəhbərləri Azərbaycan Tarix Muzeyini bir neçə saata ev halına salaraq Rəşid Behbudovun evi kimi təqdim edirlər. Rac Kapur Azərbaycanın ev halına salınmış ən baxımlı binasına girəndə təəccüblənərək Rəşid Behbudova deyir:

"Dostum, mən elə bilirdim ki, sənin kimi dünya şöhrətli insan saraylarda qalır, amma bizdə ən adi artistin belə evi var!".

İkinci xatirə

Rac Kapur Bakıya gələn vaxt Hind Filmləri Festivalı çərçivəsində öz ölkəsinin ekran məhsulları ilə bərabər, Azərbaycanın da bir kinosunu izləmək istəyir. Həmin vaxt onların qrupunda görkəmli rejissor Hüseyn Seyidzadə də yer alır. Rac Kapura da elə onun çəkdiyi "O olmasın, bu olsun" filminə baxmağı məsləhət görürlər. O, filmə baxandan sonra sözün yaxşı mənasında heyrətini gizlədə bilmir. Hüseyn Seyidzadəyə deyir ki, sən Hindistana gəl, səni milyonçu edim. Amma rejissor bu təklifi qəbul etmir.

Qeyd edək ki, "Avara", "Cənab 420" və başqa filmlərlə az qala bütün dünyada tanınan Rac Kapur hind kino tarixinin ən önəmli simalarındandır.