MM-nın Mədəniyyət komitəsinin sədri Qənirə Paşayeva əməkdar incəsənət xadimi Orxan Fikrətoğlu ilə görüşüb.

Kult.az xəbər verir ki, millət vəkili O.Fikrətoğlunu yubileyi münasibətilə təbrik edib, yeni uğurlar arzulayıb.

“Sizi – tanınmış yazıçı, ssenarist, rejissor və jurnalisti 55 illik yubileyiniz münasibəti ilə təbrik edir, möhkəm can sağlığı, yeni yaradıcılıq uğurları diləyirəm!

Sizin ziyalılığınız, peşəkarlığınız, xəlqi duyğu və düşüncələri çağdaş çağırışlarla uyumlu şəkildə sənətdə əks etdirməniz oxucu və tamaşaçılarımıza yaxşı məlumdur.

Siz müxtəlif dövrlərdə C.Cabbarlı adına "Azərbaycanfilm" kinostudiyasının, Dövlət Kino Komitəsinin, “AzərTelefilm”in, “Günay” qəzetinin baş redaktoru, dövlətlərarası MİR teleşirkətinin direktor müavini, “Mozalan” satirik kinojurnalının direktoru və ANS-in baş icmalçısı olmusunuz. Hazırda pedaqoji fəaliyyətinizi davam etdirməklə yanaşı, ATV-də veriliş aparıcısısız.

Sizin pyesləriniz ölkə teatrlarında səhnələşdirilib. Müəllifi olduğunuz əsərlər oxucuların geniş marağına səbəb olub. Bir sıra ödüllərə layiq görülmüsüz.

Sizi bir daha təbrik edir, ən xoş diləklərimizi yetiririk!” – millət vəkilinin Komitə adından təqdim etdiyi təbrik məktubunda bildirilib.

Komitə sədri yubilyara üzərində “Qarabağ Azərbaycandır!” yazılı qol saatı və Qarabağ motivli xatirə hədiyyələri təqdim edib.

Görüşdə RHİMİB sədri Arzu Bağırova iştirak edib.