Bu gün xalq artisti Arif Quliyevin doğum günüdür.

Axar.az xatırladır ki, Arif Quliyev 1950-ci il mayın 14-də Əli Bayramlı (indiki Şirvan) şəhərində doğulub. 1965-ci ildə Bakı Mədəni-Maarif Texnikumunun "Dram və kino aktyorluğu" fakültəsinə daxil olub. 1968-ci ildə texnikumu bitirib, Mingəçevir Dövlət Dram Teatrına təyinatla işləməyə göndərilib.

Aktyorun "Şans", "Bığ əhvalatı", "Lift əhvalatı", "Yarımştat", "Evləri köndələn yar" və başqa teletamaşalarda oynadığı rollar tamaşaçıların rəğbətini qazanıb. "Bəyin oğurlanması", "Yaramaz", "Bəxt üzüyü", "O dünyadan salam", "Qəm pəncərəsi", "Mənim ağ şəhərim", "Alma almaya bənzər", "Ağ gəmi" kimi bədii filmlərdəki obrazları hələ də maraqla qarşılanır.

Arif Quliyev 1982-ci ildə Respublika Gənclər mükafatına, 1988-ci ildə əməkdar artist fəxri adına, 1993-cü ildə "Humay" mükafatına, 1994-cü ildə xalq artisti fəxri adına layiq görülüb.

O, 2006-cı ildə teatrda qazandığı uğurlara görə "Qızıl Dərviş" mükafatı alıb.