Ədalət Partiyası aprelin 19-da Ali Məclisin iclasını keçirib və müvafiq qərarlar qəbul edib. Ali Məclis Qurultaya hazırlıq üzrə Təşkilat Komitəsinin yaradılması haqqında da qərar verib və bütün səlahiyyətlər də o vaxtdan Təşkilat Komitəsinə keçib. Bir neçə şəxsin yenidən Ali Məclisin iclasını keçirmək səlahiyyəti yoxdur. Bu hərəkətlər Nizamnaməyə ziddir. Üstəlik, həmin toplantıda nəinki Ali Məclis üzvləri, heç partiya üzvləri iştirak etməyiblər.

Bu sözləri Axar.az-a açıqlamasında Ədalət Partiyasının sədr müavini Mütəllim Rəhimli deyib.

“Mən Ədalət Partiyasının yaradıcılarından biri olmuşam. Həyatımı bu partiyanın qurulmasına həsr etmişəm. Bunlar məni üzvülükdən çıxara bilməzlər. Həm də partiya üzvü olmayan, qohum və dostlarını xahiş-minnətlə, yalvarışla toplayıb partiya adından “qərar” vermək əxlaqa və qanuna ziddir. Bu özfəaliyyətdir. Onların evlərində verdikləri qərarın partiya həyatına nə dəxli var?! Mən soruşuram, orada rayon təşkilatlarının nümayəndələri iştirak etmədiyi halda necə qərar vermək olar və yaxud bu yığıncağın adı nə olacaq? Siyasi Şura 19 apreldən yoxdur, belə halda o, necə qərar verir? Həm də Nizamnaməyə görə partiya üzvünü rayon təşkilatı üzvülükdən çıxara bilər. Rayon təşkilatının isə belə bir qərarı yoxdur.

Rayon təşkilatlarının təmsilçilərinin iştirakı ilə Ali Məclis keçirilib və onun qərarları da yerinə yetirilir. Mayın 17-də Ədalət Partiyasının növbəti IX Qurultayı olacaq”, - M.Rəhimli bildirib.

Qeyd edək ki, Ədalət Partiyası Siyasi Şurası Mütəllim Rəhimlinin partiyadan çıxarılıması barədə qərar qəbul edib. Ali Məclis bu qərarı dəstəkləyib.