Bakı və Tehran elə bir coğrafi və siyasi asılılıq şəraitində yerləşirlər ki, onlar ya gərək dost olsunlar, ya da bir-birilə sərt rəqabətə hazırlaşsınlar.

Bu sözləri Axar.az-a açıqlamasında rusiyalı politoloq Qriqori Trofimçuk Azərbaycan Prezidenti İlham Əliyevin İrana səfəri və imzalanan müqavilələri şərh edərkən söyləyib. Onun sözlərinə görə, bu tərəflər arasında orta mövqe tutmaq mümkün deyil:

"Bu gün İranla Azərbaycan arasında əməkdaşlıq xətti güclənir və bu, dünyanın hazırkı vəziyyətində yaxşıdır. Ona görə də Azərbaycan Prezidenti İlham Əliyev iki ölkə arasında hazırkı əlaqələrin yeni keyfiyyət mərhələsini gündəmə gətirdi. "Şimal-Cənub" layihəsi nəqliyyat xarakteri daşıyır, bunun üçün də strateji anlayışı ilə öz tərkibinə körpüləri və digər vacib infrastruktur obyektlərini daxil edir. Bununla da Azərbaycan və İran geosiyasi hadisələrin inkişafında, elə də asan olmayan iqtisadi konyunktura fonunda birgə güclənməyə hazırlaşırlar. Bu əməkdaşlıq mənim son illər ərzində regional maraqların qorunması üçün irəli sürdüyüm "Xəzər qalası" anlayışı istiqamətində atılan addımdır. Bu proyektlər Qafqazdan daha çox, Xəzərlə bağlıdır. Qafqazın ümumi inkişafından danışarkən bir-biri ilə maraqları kəsişməyən iki əsas qrupu diqqətə almaq lazımdır. Bunun da əsasında həmişə Ermənistan-Azərbaycan münaqişəsi dayanır. Bu konflikt həm regiona xammal transferi, həm də regiondakı nəqliyyat şəbəkəsinə mənfi təsir edir. Əgər Rusiya və İranı Azərbaycanla Ermənistan arasında siyasi balanslaşma planında müqayisə etsək, o zaman İranın belə bir problemin həllində rolu az olacaq. Rusiyaya da artıq bu zidiyyətin içində qalmaq çox çətin olur".

Qeyd edək ki, İlham Əliyev fevralın 23-də İrana səfər edib. Səfər çərçivəsində Azərbaycanla İran arasında 11 müqavilə imzalanıb. Tərəflər mətbuata açıqlamalarında "Şimal-Cənub" layihəsinin bölgə üçün yeni inkişafa səbəb olacağını bildiriblər.